BUTUAN CITY – Ang isyu sa African Swine Fever kon ASF ug Novel Coronavirus kon nCOV nakasentro ang hisgutanan sa pagpatawag ni Pangulong Rodrigo Duterte sa tanang mga mayors sa tibuok nasud kagahapon sa Pasay City.
Sa eksklusibong pakighinabi sa Bombo Radyo Butuan, gipadayag ni Nasipit, Agusan del Norte Mayor Enrico Corvera nga ang maong mga hulga sa panglawas maoy gitutukan sa pangulo tungod kay maka-apekto kini sa kinabag-ang katawhan.
Sa maong tigom usab gipasabot matud pa ni Health Secretary Francisco Duque nga wala’y angayang ika-alarma ang katawhan sa rasong wala matud pa’t natalang local transmission dinhi sa nasud ilabina nga ang mga direktang na-apektuhan niini naggikan man sa China apil na ang natalang patay dinhi sa Pilipinas nga nakumpirmang nakuha ang maong sakit samtang atua pa sa Wuhan City sa Hubei Province sa China.
Sa iyang kabahinan isip amahan sa lungsod sa Nasipit, nagmugna na siya og Task Force nga maoy mututok sa mga pasahero sa barkong mangabot agi sa pantalan sa ilang lungsod. Ang mga mangabot matud pang pasahero, gina-monitor ang temperatura sa ilang lawas aron ma-quarantine higayong mu-abot sa temperaturang makonsidera nang apil sa simtomas san COV.
Tungod niini, dili angayang mag-panic ang katawhan kansa napamatud-an sa mga health officials pinaagi sa hurot-hurot na nga stocks sa face masks.
