BUTUAN CITY – Mapasigarbong gipadayag sa top notcher sa Licensure Examination for Teachers kon LET-Bachelor of Elementary Education nga ang usa ka tuig nga pag-ampo ug preparasyon ang iyang yawi ngadto sa maong kalampusan.
Gipadayag kini ni Kezia Keren Ambag nga taga-Brgy. San Agustin, lungsod sa Talacogon, Agusan del Sur sa eksklusibong pakighinabi sa Bombo Radyo Butuan.
Sigon ni Ambag, sulod sa usa ka tuig apil sa iyang gi-andam ang iyang physical, mental, spiritual, og emotional aspect sa iyang kaugalingon. Iyang gitamdan usab ang tambag kaniya sa top notcher sa LET-BSEd niadtong Marso nga kung unsa kalawom ug kasubsob ang iyang pagtuon, mas labaw ang iyang gitagana alang sa pag-ampo.
Aminado siyang bisan unsaon niya pagtuon kung dili niya kini gipangaliya sa Kahitas-an, dili niya makab-ot ang maong kalampusan.
Tungod sa nakab-ot nga kalampusan, gipasalamatan niya ang tanang nakatabang kaniya diha sa pagpahuwam kaniya og mga review materials, ang hugot nga suporta sa iyang mga ginikanan ilabina ang pag-ampo kaniya sa iyang mga ka-ubanan sa simbahan dinhi sa Butuan og sa ilang lungsod.
Tambag niya alang niadtong mga wala nakapasar, ipadayon ang ilang mga damgo tungod kay ang Ginoo matud pa ang nasayod kung unsa ang angayang ihatag sa usa ka tawo basta ubanan lang sa mga pag-ampo.
Sa pagkakaron, wala pa siya’y easpisipikong plano rason nga laing pag-ampo na usab ang iyang himuon uban sa iyang mga ka-ubanan sa simbahan aron magiyahan siya sa sunod niyang himuong lakang.
