BUTUAN CITY – Mitala og 2 ka patay ang natigayong disgrasya sa kadalanan bandang alas 8:40 kagabii sa national highway may Purok 5, Brgy. Matabao, sakop sa lungsod sa Buenavista, Agusan del Norte.
Sa nakuhang impormasyon ning sibyahan, hubog ang drayber sa Toyota Hilux nga si Paulo Tan Gustillo, 24-anyos, nagpuyo sa Brgy. Causwagan, Cagayan de Oro City dihang nadumbulan niini ang motorsiklong gimanehuan ni Christopher Landela Pande, 18-anyos ug angkas nga si Mariafe Jomoc Lopez, 29-anyos, parehong residente sa Purok 4 Sampinit, Brgy. Talo-ao, Buenavista, Agusan Del Norte.
Tungod sa kakusog sa pagdumbol, nalagpot og nabunal sa sementadong dalan ang mga biktima kinsa gideklarang dead-on-arrival sa paghidangat sa Agusan del Norte Provincial Hospital.
Parehong gikostudiya sa Buenavista Municipal Police Station ang duha ka mga sakyanan alang sa tukmang disposisyon.
