BUTUAN CITY – Mitala og daghang angol lakip na ang 2 nga kritikal dihang gisungag sa elf truck ang usa ka multicab sa may Barangay Del Rosario, lungsod sa Tubod, lalawigan sa Surigao del Norte ning mi-aging alas-7:45 sa buntag sa nakalabay nga adlaw.
Sa pakighinabi sa Bombo Radyo Butuan, gibutyag ni Police Capt. Randy Azote, hepe sa Tubod Municipal Police Station, nga padulong unta sa Butuan City ang elf truck nga miguyod sa laing elf truck dihang nabugto ang gigamit nga pisi sa pag-guyod.
Imbes nga modumbol sa gisundan nga elf, mitipas hinuon kini sa pikas lane rasong nakasungag niini ang pde-pasaherong multicab nga padulong sa Surigao nga duna’y kargang 8 ka mga pasahero.
Naila ang mga angol nga sila Michael Bernard Bañosa nga taga Bayugan City; Albert Ehas,13-anyos nga taga San Roque Kitcharao, Agusan Del Norte; Rosemarie Bihag, 49-anyos nga residente usab Barangay San Roque; Richard Brial, 28-anyos nga taga Barangay Tungao, Butuan City; Junrey Abis,26-anyos nga residente sa Barangay Tungao; Ramon Lauron Orcullo,26-anyos usa ka magtutudlo nga taga Mainit, Surigao Del Norte; Leon Cainoy, drayber sa multicab nga taga Mahayahay, Kitcharao; Reneboy Bagnol Ubang, 38-anyos taga Barangay San Juan, Alegria, Surigao Del Norte; Aireen Mahinay, 32-anyos, magtutudlo nga taga Barangay Anahaw, Alegria; Richarad Marano, 28-anyos taga Alegria ug Rafael Batus nga residente usab sa maong dapit.
Gidala sa Caraga Hospital sa Surigao ang mga biktima apan ang drayber sa multicab gi-refer sa Davao City alang sa dugang medikal nga atensiyon tungod sa kritikal niining kahimtang.
Hinuon misaad ang tag-iya sa elf truck nga abagahon ang galastuhan sa pagpatambal sa mga biktima samtang ang drayber karun sa nagguyod nga elf truck nagtingkagol na sa prisuhan alang sa tukmang disposasyon.
