BUTUAN CITY – Gibaha og simpatiya ingon man mga school supplies ang usa ka estudyante sa Lianga National Comprehensive High School sa Brgy. Poblacion, lungsod sa Lianga, Surigao del Sur human nag-viral ang post sa usa ka Math teacher dihang nakita siyang migamit og dahon sa saging aron iyang sulatan sa ilang mga leksyon inay nga notebook.
Sa eksklusibong pakighinabi sa Bombo Radyo Butuan, gipadayag ni teacher Arcilyn Balbin Azarcon nga wala siya magtuong tinud-anay diay ang gihimo sa 16-anyos nga grade 8 nga estudyanteng si Erlande ‘Loloy’ Monter kinsa gusto lang nga mahatagan og puntos rason nga wala niya gihimong babag ang kawala’y notebook aron dili makasulat sa ilang leksyon.
Tungod kay natandog sa iyang nakita dihang gilibot niya ang mga estudyanteng gipakopya niya sa mga sinulat niya sa blackboard, gikuhaan niya kini og hulagway og gi-post sa iyang account.
Tumong lamang unta ni titser Azarcon nga ipakita sa uban niyang mga estudyante ang kasibot ni Erlande nga makatapos sa pagtuon bisan og kuwang sa mga gamit sukwahi sa ubang kompleto ang ilang mga school supplies apan blangko kini tungod kay amg-picture na lang sa sulatunon gamit ang cell phone.
