But
BUTUAN CITY – Nakurat ang magtutunghang taga-Butuan City human kini nag-Top 1 sa bag-ohay nga migawas nga resulta sa October 2019 Geodetic Engineer board exam.
Sa eksklusibong pakighinabi sa Bombo Radyo Butuan kang Charlene Gallentes Bolastig gikan sa Caraga State University kon CSU kansa nakakuha sa rating nga 91.20 percent, gibutyag niini nga nakurat siya sa dihang nahibal-an ang resulta.
Sumala pa niini, gipangayu lang niya sa Ginoo nga siya makapasar rasong wala niya damha nga siya ang manguna sa tanang mikuha sa eksam.
Apan gipahayag niini nga kampante siya sa dihang mi-eksam tungod kay andam siya niini diin 4 ka bulan pa siyang nag-review didto sa kauluhang Manila.
Ang pagtinarong matud pa sa pagtungha ang nahimo niining puhunan sa nakab-ot nga kalampusan.
Sa karun planong niyang magtudlo og nanghinaot nga mahatagan og tsansa unibersidad diin siya migradwar.
Nasayran nga kauban niyang nag-Top sa Geodetic Engineer board exam ang laing 3 nga gikan sa CSU nga nailang sila NICK ANN WILSON ROSERO DAPO ang Top-5 sa rating nga 87.60 percent, RICHARD SAGALDIA PEPITO ang Top 6 kansa nakakuha sa 87.00 percent og MARK DAVE BUICO PLAZA ang Top-8 sa rating nga 86.40 percent.
Si Charlene Gallentes Bolastig, migradwar isip Cum Laude, ang ika-upat sa unom ka magsoon diin ang amahan niini usa ka maguuma nga taga Barangay Don Francisco, Butuan City.
