BUTUAN CITY – Padayon ang gilusad nga imbestigasyon sa kapulisan sa Carmen, Surigao del Sur aron duna’y mahatag nga dokumento ngadto sa pamilya sa usa ka cadreman nga gipusil-patay sa iyang sakop nga Civilian Active Auxilliary kon CAA member kinsa nagpusil-patay usab sa iyang kaugalingon.
Naila ang gipusil nga si Sgt. Marlon Tacbobo – cadreman sa CAA detachment nga nakabase sa Purok 8, Brgy. Puyat sakop sa maong lungsod samtang ang suspek mao si CAA member Ota Abas, parehong sakop sa Carlie Company sa 36th Infantry Battalion, Philippine Army.
Sa eksklusibong pakighinabi sa Bombo Radyo Butuan, gipadayag ni Carmen Municipal Chief of Police Captain Reovic Matildo nga ning mi-agi pang Martes sa buntag, nag-inom na ang suspek og nangita na usab og bikil rason nga gibadlong kini ni Sgt. Tacbobo.
Apan pagka alas-2:30 sa kaadlawon, misulod matud pa sa maong detachment si Abas og gikuha ang M16 armalite rifle sa natulog niyang ka-uban daying pusil sa iyang opisyal nga niadtong higayuna natulog sa duyan.
Maayong pagkabungkag ang ulo niini rason sa nagkatag nga utok og pagsudlot sa mata sa biktima ug human sa maong hitabo, nagpusil usab sa iyang kaugalingon si Abas diha sa iyang baba rason sa pagkabungkag usab sa iyang ulo. Dugang ni Captain Matildo, naila nang maoy gyod ang suspek nga si Abas higayong maka-inom ug gani kini ang rason nga giplanuhang tangtangon kini sa katungdanan.
Giklaro usab sa opisyal nga padayon ang ilang imbestigasyon sa maong hitabo bisan og patay usab ang suspek aron duna’y supporting documents ang pamilya ni Sgt. Tacbobo sa ila unyang claim sa death benefits niini.
