BUTUAN CITY – Padayon pang gisuta sa otoridad ang tinud-anay nga hinungdan sa kamatayon sa mag-uuma nga nakit-an nalang nga wala nay kinabuhi kagahapon sa alas 8:00 sa buntag sa bukirang parte sa Purok-5C, Barangay Antongalon ning siyudad sa Butuan.
Sa eksklusibong pakighinabi sa Bombo Radyo Butuan kang Barangay Antongalon Kagawas Ariel Jaspe, giila niini ang biktima nga si Allan Balladares, 51-anyos, olitawo ug residente sa maong dapit.
Saysay pa sa Kagawad, nakadawat sila kagahapon ug balita gikan sa Purok President nga si Pablo Roca mahitungod sa nakit-an nga patay’ng lawas.
Dali silang misaka sa bukid kauban ang kapulisan sa Butuan City Police Station 4 sa pagpanguna sa hepe nga si Police Captain Rodel Dorado ug didto nakita ang lawas sa biktima nga anaa na sa state of decomposition.
Sa nakuhang impormasyon, niadtong Biernes pa ulahing nakit-an ang biktima nga nakig-inom og gipangita sa mga kabanay human sa pipila ka adlaw na nga pagkahanaw.
Nakita ang patay’ng lawas sa biktima sa sagbutan nga layu sa iyang payag pinaagi usab sa binuhing iro niini nga wala mibiya kaniya ug nagsige ug paghot.
Misaka usab sa nahitaboan ang taga-Scene of the Crime Operatives kon SOCO.
Sigon pa ni Kagawad Jaspe, napa-akan og iro ang biktima usa ka bulan na ang nakalabay nga usa sa gilantaw karun nga hinungdan sa kamatayon niini ilabina dihang nasutang wala kini magpa-inject og anti-rabbies samtang ang irong nakapa-ak kaniya nabuang.
Samtang wala usab gisalindot saa mga otoridad ang posibilidad nga dunay foul play sa maong panghitabo.
