BUTUAN CITY – Wala na makagawas pang buhi ang usa ka babayeng duna’y deperensya sa pangisip human gilamoy sa kalayo ang ilang pinuy-anan kagahapon sa hapon resulta sa iyang pagkapa-ig.
Naila ang biktimang si Alma Bundia, 49-anyos, minyo og residente sa Purok 2, Brgy. Bonbon ning siyudad sa Butuan.
Gibana-banang mukabat sa 200-mil pesos ang damyos sa sunog nga nagsugod pasado alas-tres kagahapon sa hapon og nadeklarang fireout pasado alas-4:05 sa hapon human girespondihan sa tulo ka mga fire trucks.
Daling gisuhid sa mga bombero ang na-ugdaw nga balay aron pangitaon ang na-missing nga si Buendia og didto na sa pansayan napalgan ang iyang patay’ng lawas.
Sigon sa mga silingan, nakadungog pa sila nga duna’y nagkatawa sa sulod nga bahin sa maong panimalay nga gitu-uhang gikan sa biktima. Padayon pang gisuta kung asa gikan ang mi-ulbong kalayo.
