BUTUAN CITY – Gikatakdang mangabot karong Dominggo sa ala-1:30 sa kaadlawon sa pantalan sa Nasipit, Agusan del Norte ang 772 ka mga pasaherong gikan sa kauluhang Manila human milarga kaganinang alas-dos sa hapon.
Sila kabahin na sa gipapa-uling mga Locally Stranded Individuals kon LSIs ug mga Returning Overseas Filipinos kon ROFs nga pila ka buwang natanggong sa Metro Manila ug ubang bahin sa Luzon human na-abtan og lockdown.
Sa eksklusibong pakighinabi sa Bombo Radyo Butuan, gipadayag ni port police Col. Jose Maria Yares sa Philippine Ports Authority kon PPA-Nasipit area, nga muhapit pa unta ang barko sa Togo Shipping Lines sa Cebu City aron kuhaon ang uban pang mga Caraganons nga manguli sa Caraga kansa dili na madayon tungod sa pagpa-ilalom sa Inter-Agency Task Force sa maong siyudad ngadto sa Enhanced Community Quarantine kon ECQ.
Gipasabot sa opisyal nga bugtong tahas lamang nilang taga-PPA mao ang pag-disinfect sa mga pasahero ug sa bitbit nilang mga bagahe ug ang taga-Department of Health kon DOH na ang muhimo sa pagkuha sa ilang mga rapid tests atol sa ilang pagkanaog gikan sa barko adiser sunduon ang mga magnegatibo sa mga sakyanang gikomisyon sa local government unit sa nga ilang uli-an.
Aron matud pa hapsay ang pagpakanaog sa maong mga pasahero, pakana-ugon sila by-batch kondiin unahon ang mga taga-lagyo nga lalawigan ning rehiyon hangtud na sa pinakaduol.
