BUTUAN CITY – Grasya sa Ginoo alang kang Atty. Orlando ‘Orly’ Vicente Montalban, kanhi tigpamaba sa Bureau of Jail, Management and Penology kon BJMP-Caraga ug karon na-assign na sa Region X, ang pagpasar niya sa 2022 bar examination.
Kini tungod kay wala niya kini gila-uman tungod sa grabeng mga hagit nga iyang nasinatian atol mismo sa adlaw sa eksaminasyon ilabina ang hagit sa panglawas.
Sa eksklusibong pakighinabi sa Bombo Radyo Butuan, gipadayag ni Atty. Montalban nga dakong hagit ang iyang pag-take sa bar exam ning mi-aging tuig tungod kay sa ikaduha ug ika-upat nga adlaw sa eksaminasyon, gi-oxygen siya human nga mi-abot ang iyang blood pressure ngadto sa 180 to 110 nga posibleng tungod sa pressure ug kawala na’y tulog.
Wala matud pa siya tuguti sa Korte Suprema nga mukuha sa maong eksaminasyon tungod kay ubos matud pa sa ilang liability kung duna’y mahitabo kaniya niadtong mga tungura apan tungod sa iyang kapursigido, na-delay og 4-minutos ang iyang pagkuha niini tungod kay gipa-ubos pa man ang iyang blood pressure.
Gisaysay pa niini nga lisod matud pa kaayo ang dalan nga iyang gisubay adiser mipasar sa bar exam tungod kay iyang gikuha ang Bachelor of Laws sa edad na nga 41-anyos rason nga iya gayong gipaningkamutan nga mahuman niya ang kurso sulod lang sa upat ka mga tuig.
Anaa pa ang iyang obligasyon sa iyang pagpanarbaho apil na sa iyang pamilya rason nga gibahin gayod niya ang oras aron makapadayon ug makatapos sa pagtungha sa abogasya ilabina nga usa sa iyang gikonsidera ang iyang pinansyal nga aspeto.
Dakong tabang matud pa sa iyang pagtungha nga nahimo siyang scholar sa Liceo de Cagayan sa Cagayan de Oro City.
