BUTUAN CITY – Gikumpasan sa mga drivers sa mga pribado ug pampublikong sakyanan ang gipatumang bigtime oil price rollback sa Petro Gazz sa may JC Aquino corner Ochoa Avenue ning siyudad sa Butuan nga gisugdan kaganinang buntag hangtud sa Marso 13, adlaw’ng Dominggo.
Mukabat sa 5-pesos ug 85-sentabos ang gikunhod sa kada-litro sa ilang diesel samtang 3-pesos ug 60-sentabos usab sa kada-litro sa ilang gasolina.
Tungod niini, mukabat na sa 56-pesos ug 10-sentabos ang presyo sa kada-litro sa ilang diesel samtang sa gasolina, 61-pesos ug 18-sentabosang kada-litro sa ilang regular ug 61-pesos ug 48-sentabos usab sa ilang special.
Sigon ni intra-city route driver Jason Montero nga nagbiyahian sa route 10, tungod sa grabe kamahal sa presyo karon sa gasolina, natural lang nga mangita sila og gasolinahan diin makabarato sila.
Kini ilabina nga mu-net na lang siya og 300-peso kada-adlaw tungod sa pagpasaka sa iyang operator diha sa iyang boundary nga mu-abot na sa 500-pesos kada-adlaw.
Iya na lang gikatawa ang usahay, duna’y higayon nga makatapal pa siya.
Alang usab sa motoristang si Eufemio Duhilag nga taga-Buenavista, Agusan del Norte, makatabang na kaniya kinsa kada-adlaw nga mag-ulian gikan sa iyang trabaho ning siyudad ang rollback sa Petro Gazz bisan og hangtud lang kini sa upat ka mga adlaw.
Iyang gibutyag nga tungod sa kamahal karon sa gasolina, dili na pwede ang magsuroy-suroy ug kinahanglang concentrate na lang sa trabaho.
