BUTUAN CITY – Duna na’y tulo ka mga contenders nga gikonsidera karon ang coalition government sa Japan aron ihulip sa mi-resign nga si Prime Minister Shinzo Abe.
Sa eksklusibong pakighinabi sa Bombo Radyo Butuan, gipadayag sa Butuanong si Reuben Cabaluna, kinsa 30 ka tuig nang nagpuyo sa Japan nga sa tigom kagabii sa main Liberal Democratic Party nga maoy nanguna sa coalition government, apil sa tulong gipili-an ang 56-anyos nga si Defence Minister Taro Kono kinsa suportado sa anak ni kanhi Prime Minister Junichiro Koizumi.
Ikaduha ang 63-anyos nga si kanhi Foreign Minister Fumio Kishida kinsa suportado ni Finance Minister Taro Aso ug nagserbisyo isip foreign minister sa kadumalahan ni Abe nidtong tuig 2012 hangtud 2017.
Ikatulo mao ang 63-anyos nga kanhi Defense Minister nga si Shigeru Ishiba.
Sigon ni Cabaluna, karong semanaha na masayran kung kinsa sa tulo ang musunod sa nahabiling mga bulan sa pagpangatungdanan ni Abe tungod kay magtagbo pa ang LDP pagpanguna kansa padayon pang naghan-ay sa ilang grupo.
Ang muhulip kang Abe mao matud pa ang magsilbing premiro ministro sa Japan hangtud nga ang mapiling mga membro sa parliamento sa himuong eleksyon sa Septembre sunod tuig, makapili na og bag-o nilang premiro ministro gikan unya sa mudaog nga partido diin kini kuhaon.
