Mga wala makadawat og SAP sa Barangay Sumilihon, mireklamo

BUTUAN CITY – Samang mga reklamo gihapon ang nadawat ning sibyahan human ang subling pag-apod-apod sa Social Amelioration Program kon SAP sa Department of Social Welfare and Development kon DSWD.

 Giadtuan sa Bombo Newsteam ang Barangay Sumilihon ning siyudad sa Butuan usa ka adlaw human natunol ang dugang tabang gikan sa SAP kagahapong adlawa.

 Nakahinabi ning sibyahan ang pamilya sa 87-anyos nga si Anatolia Galbe kansa angayan matud pang makadawat sa maong tabang pinansiyal gikan sa gobyerno tungod sa iyang sitwasyun nga dili na makakita ug makalakaw.

Sumala pa sa iyang kabanay nga si Emily Tentil, gidool ang lola sa usa ka purok president diin gipapirma tungod kay dunay madawat gikan sa SAP.

Tungod kay dili na makakita pa, nag-thumb mark nalang kini dayung pasalig nga maghulat nalang sa pag-release sa SAP, butang nga napakyas.

Sumala pa niini nga dakong tabang na unta kini sa maong tigulang nga dunay mga panginahanglanon apan wala nay mahimo tungod sa iyang kahimtang.

Ang labing gikasakit niini kay dunay mga nakadawat matud pang dunay mahimo sa kinabuhi.

Gireklamo usab ning sibyahan sa usa ka Melita Balaba nagpuyo sa samang barangay ang wala pagka-apil niya sa nakadawat sa SAP nga gitunol kagahapong adlawa.

Sumala pa niini sa eksklusibong pakighinabi ning sibyahan, hilabihan ang iyang kasubo kay wala siya mahatagan og SAP nga unta angayan man siya tungod sa iyang sitwasyun nga maglisud na og lakaw human usab na-stroke diin dili na malihok ang pikas lawas.

Dako na unta matud pa kining tabang kaniya ilabina sa pagpalit og tambal ug kunsumo..

Samtang sa kabahinan usab ni Emelito Tingting, 30-anyos og usa ka construction, gipahayag niini nga gihatagan usab siya og papel nga matud pa makadawat sa SAP apan natapos nalang ang pag-apod-apod niini kagahapong adlawa. Sumala pa niini nga gipapirma usab siya og gisaaran nga magpaabot lang.

Nasayran nga kini usa ka construction nga nawad-an og trabaho../