BUTUAN CITY – Landig sa balay-tambalanan ang 5 ka indibidwal human naka-angkon og mga pali sa kalawasan sa dihang nadisgrasya ang ilang sakyanan tungod sa kadanlog sa dalan nga hatud sa kusog nga pag-ulan kagabii sa alas 6:20 sa may National Highway, sa Purok-3, Barangay Sanghan, Cabadbaran City, Agusan del Norte.
Naila ang mga biktima nga sila Alinader Adi Bao, 42-anyos; Casim Sumangan, 47-anyos ; Saiben Ampawa Alim, 34-anyos; Songgod Dimarag Bao, 64-anyos; og Aslia Adi Bao, 58-anyos nga parehong residente sa Mulondo, Lanao del Sur.
Sakay ang mga biktima sa Silver Fortuner, nga nagtangag sa plaka numero LAD 5080 nga gimanehuan ni Alinader Bao.
Tungod sa kadanlog sa dalan, nawad-an og kontrol ang drayber sa sakyanan nga mituyok pa adiser mibangga sa kilid nga parte sa dalan atubangan sa National Irrigation Association building.
Ang nasangpit nga sakyanan nagbiyahe gikan sa Lanao del Sur padulong unta sa Surigao City.
Daling girespondihan sa Cabadbaran City Disaster Risk Reduction and Management Office kon CDRRMO ang maong aksidente diin ang mga biktima daling gidala usab sa Cabadbaran District Hospital.
