BUTUAN CITY -Hingpit nang nakit-an ang tulo ka mga indibidwal nga na-missing human kini naligo sa usa ka beach sa Barangay Baucawe, Lianga, Surigao Del Sur. Naila ang mga niini nga sila Carl Dave Hingpit, Philip Ian Hingpit, og Reggy Permito Jr. nga pulos taga Barangay San Vicente, Prosperidad, Agusan Del Sur.
Nasayran nga dunay selebrasyon niadtong higayona rasong naligo ang taga Prosperidad, Agusan Del Sur bisan paman og duna pay mga kusog nga aftershocks human ang 7.4 magnitude nga linog.
Tungod sa dagkong mga balud, 5 ka mga indibidwal ang nawala og gitoohang nalumos. Una nang nakit-an ang duha nga magsoon nga sila Ivan Mutya og Napoleon Mutya jr apan wala na kini kinabuhi pa.
Ang mga rescuer gikan sa Municipal Disaster Risk Reduction and Management Office kon MDRRMO sa Prosperidad, Agusan Del Sur, mihimo kagahapon og retrieval operation diin alas 6:35 sa buntag sa dihang nakit-an sa mananagat ang duha niini samtang ang usa nadagsa sa beach diin sila nangaligo.
