BUTUAN CITY – Nailo ang lima ka gagmay bata human gipusil-patay ang ilang amahan sa wala pa mailhing suspek sa District 1 Purok Motor pool Barangay Sta. Ana, Nasipit, Agusan del Norte ning nakalabay nga gabie.
Migawas sa inisyal nga imbestigasyon nga samtang natulog ang biktimang si Eleazar Cabungcal, 62 -anyos, byudo sulod sa ilang payag, gisaka sa wala pa mailhing suspek dayong pusil sa dughan kansa nabantayan lang sa kamaguwangan niyang 9-anyos nga anak nga babaye pagkabuntag na.
Daling nagpakitabang ang bata kondiin gidala gilayon sa ospital ang iyang amahan apan gideklara nang dead-on-arrival sa attending physician.
Napahiluna na usab sa Brgy. Kahayagan sakop sa Carmen, Agusan del Norte ang patay’ng lawas sa bitkima kinsa usa ka buwan pa lang nga nabyudo rason nga na-ilo karon ang lima niya ka mga anak nga nag-edad og 9, 7,5, 3. ug mag 2-anyos.
Sa eksklusibong pakighinabi sa Bombo Radyo Butuan, gibutyag ni tribal leader Angelito Mosqueda alyas Datu Mahipanaw nga siya karon ang kasamtangang nag-atiman sa lima ka nailong bata kinsa andam ipasagop nga legal sa taga-Municipal Social Welfare and Development sa maong lungsod kung dili mupasalig sa pagbuhi kanila ang kabaay sa ilang mga ginikanan.
