BUTUAN CITY – Malampusong narekober sa mga sakop sa Bislig City Central Fire Station sa Surigao del Sur ang upat ka patay’ng lawas nga na-trap sa usa ka cave system sa Sitio Sikahoy, Barangay San Jose, sakop sa maong siyudad.
Kini human ang gilusad nga search and retrieval operation uban sa mga sakop sa City Disaster Risk Reduction and Management Office kon CDRRMO-Bislig pagpanguna usab ni acting city fire marshal FSInsp John Rey Mejores nga maoy nagsilbing incident commander.
Gisugdan ang operasyon pasado alas-7:12 niadtong Lunes sa gabii ug natapos sa alas-10:30 na sa gabii kondiin ma-ampingong gisuong sa grupo ang tunnel nga grabe kalapok, dili stable ang terrain ug hu-ot pa ang agi-anan.
Delikado matud pa ang maong dapit rason nga nagdala ang grupo og self-contained breathing apparatus (SCBAs) aron masiguro ang luwas nga pagginhawa ug ang operational capability alang sa limited duration.
Gitugyan na ang mga biktima ngadto sa CDRRMO-Bislig alang sa tukmang disposasyon.
