BUTUAN CITY – Tulo ka mga local chief executives ning rehiyon sa Caraga ang nasulod sa top performing officials human ang national performance evaluation survey sa Boses ng Bayan, usa ka independente ug non-commissioned group, kansa gihimo niadtong Nobyembre 27 hangtud Disyembre 2 sa tuig 2022.
Sa maong survey, si Butuan City Mayor Ronnie Vicente Lagnada maoy Top 10 isip top performing mayor gikan sa 148 ka mga city mayors sa tibuok nasud kondiin nakakuha siya og 78-porsiento.
Samtang si Agusan del Norte Governor Ma. ANgelica Rosedell Amante usab, usa sa mga napiling best performing provincial governor sa tibuok nasud.
Samtang si Agusan del Sur Congressman Adolf Edward Plaza usab ang napiling best performing congressman gikan sa 253 ka mga kongresista sa tibuok nasud.
Ang rating nga nakuha sa maong mga opisyal gibase sa ilang work performances isip local chief executives nga naghatag og dakong kaayuhan sa katawhang ilang giserbisyuhan.
Samtang dako ang pagpasalamat sa lokal nga kagamhanan sa dakbayan sa Butuan nga napili si Mayor Ronnie Vicente Lagnada isip ikanapulo nga best performing mayor sa tibuok nasud gikan sa 148 ka mga city mayors.
Sa eksklusibong pakighinabi sa Bombo Radyo, gipadayag ni Butuan City government spokesperson Michiko de Jesus nga random performance evaluation survey ang gihimo sa grupong Boses ng Bayan.
Mi-adto matud pa sa nagkada-iyang lugar sa nasud ang mga evaluators ug gipangutana ang mga tawo sa performance sa ilang mga opisyal.
Ang resulta sa survey gikalipay dili lang ni Mayor Lagnada kondili sa tanang opisyal ning siyudad tungod kay pamatuod lamang kini nga nalipay ang kinabag-ang Butuanons sa performance sa mga local officials.
