BUTUAN CITY – Tulo ka mga drug personalities ang nasikop sa mga sakop sa Butuan City Police Station 6 sa gihimong drug buy bust operation pasado alas-11:10 kagabii sa Purok 1, Brgy Sumilihon ning siyudad sa Butuan.
Nakuha gikan sa mga nadakpan nga sila alyas Butod, usa ka high value individual, uban nila alyas Kaizer ug alyas Ronel nga gika-ingong conspirator, ang gibana-banang 3-gramos sa gidudahang shabu nga nagkantidad og ₱20,400.
Nasayrang malampusong napalitan sa poseur-buyer og usa ka selyadong plastic sachet sa suspected shabu isip buy-bust item ang target subject nga si alyas Butod nga maoy namaligya og ginadiling druga.
Nakuha gikan sa ilang posisyon ang usa ka selyadong sachet sa susamang epektos nga mitimbang og 2-gramos, duha ka inablihan nang sachets sa susamang epektos ug mga personal nga gamit.
Anaa na sa kostudiya sa Butuan City Police Station 6 ang mga suspetsado uban sa nakumpiskang mga butang alang sa tukmang disposisyon.
