BUTUAN CITY – Nagresulta sa dakong police operation ang natigayong bank robbery sa Naples, Italy human gidagit sa mga armadong lalaki ang 25 katawo sulod sa bangko niadtong Huwebes (oras sa Italy).
Sigon sa taho, nagsugod ang insidente bandang udtu sa dihang gisulod sa mga suspek ang usa ka Crédit Agricole.
Gelayong miresponde ang kapulisan ug gipalibutan ang dakbalay samtang nahitabo ang hostage situation.
Sulod sa halos duha ka oras, nakignegosasyon ang mga awtoridad hangtud sa mabuhian ang tanang hostages bandang ala-1:30 sa hapon (local time).
Sumala sa mga opisyal, walay grabeng nasakitan sa insidente, apan pipila sa mga bihag nahatagan og medical assistance tungod sa pagkakurat og trauma.
Sigon sa mga nakaluwas nga gipriso sila sa usa ka lawak nga armado ang mga suspek, apan wala matud pa sila gipasakitan.
Makita sa mga video ang mga bumbero nga gibuak ang bintana aron tabangan ang mga tawo nga makagawas samtang ang mga hostages halatang nagkurog og emosyonal sa dihang nakagawas.
Mihimo gelayon og assault ang special forces apan nakasibat na ang mga suspek pinaagi sa tunnel, nga posibleng konektado sa sewer system.
Wala pa matumbok ang katibuk-ang kantidad sa gikawat tungod kay dili cash ang target sa mga suspek kundi mga personal safety deposit boxes.
Padayon pa ang imbestigasyon ug manhunt operations sa mga misibat nga suspetsado.
