BUTUAN CITY – Mi-abot sa 22 ka mga poste nga gipanag-iyahan sa Agusan del Norte Electric Cooperative, Inc. kon ANECO ang malampusong natangtang na gikan sa kadalanang apektado sa road widening project sa Department of Public Works and Highways kon DPWH-Caraga.
Nasayrang pila ka tuig nang gireklamo ang maong mga poste nga makita sa sentrong bahin sa katapusang lanes kansa wala gilayon makuha human sa road widening project tungod sa mga prosesong gi-agian.
Ang maong mga poste maoy hinungdan nga daghang mga motorista na ang nadisgrasya ilabina kadtong mga dili suhito sa dalan tungod sa pagtuong hapsay kini ug wala’y babag sama sa mga higanteng poste.
Nasayrang sa 22 ka mga natangtang nga poste ilabina sa Brgy. Bonbong, 16 pa niini ang nabalhin na sa mga sakop sa Office of the City Building Official kon OCBO.
Magpadayon matud pa ang himuong pagpanangtang uban na usab sa pag-abag sa mga telecommunication companies nga duna’y susamang lokasyon sa ilang mga poste.
