BUTUAN CITY – Gi-verify na sa Cabadbaran City Police Office sa lalawigan sa Agusan del Norte ang ilang listahan sa mga drug personalities aron masayran kung anaa pa sa maong listahan ang duha ka mga lalaking gipusil-patay pasado alas-nueve kagabii sulod sa usa ka billiard hall sa Purok 3, Brgy. Mabini, sa maong siyudad.
Sigon ni PO2 Glenn Villena, daling gidala sa Cabadbaran District Hospital sila si Antonio Librero Cailing, 33-anyos, minyo, tricycle driver nga taga P-2, Brgy 9 apan gideklarang dead on arrival sa attending physician.
Patay usab ang 33-anyos nga ulitawong si Dario Broa, pin boy sa bilyaran nga taga Purok 2, Brgy Basilisa, lungsod sa RTR samtang nagpabilin pa sa Agusan del Norte Provincial Hospital si Vicente Hermoso Galo, 47-anyos, minyo nga taga-Purok 4, Brgy Mabini sa susamang siyudad.
Sigon sa survivor nga si Galo, nagpalit matud pa sila og katol kagabii uban sa iyang mga anak diin nadunggan pa nila ang buto-buto sa armas.
Kumpyansa siyang dili madamay tungod kay naglingkod lang siya sa gimanehuang traysikol hangtud nga nakamatikod siyang mihapdos ang iyang abaga og dinhi na niya nakumpirmang na-igo diay siya. Nakita usab niya ang pagsibat sa mga suspek nga sakay sa motorsiklo.
Nasayrang nag-inom matud pa og kape ang riding in tandem suspects diha sa tindahang sikbit sa bilyaran kondiin ang driver, miplastar nang daan sa motorsiklo og daling misibat human ang pagpamusil sa mga biktima. (Beth Ruiz)
