BUTUAN CITY – Nagpabiling malaumon ang mga supporters ni Kanhe Pangulong Rodrigo Duterte nga anaa sa The Hague, Netherlands bisan paman sa nahimong disesyon sa Pre-trial Chamber 1 sa International Criminal Court kon ICC nga ipadayon ang pormal nga pagtaral niini.
Sumala pa sa Bombo International News Correspondent sa The Hague nga si Alvin Dave Sarsate, padayon silang magtapok-tapok sa gawas sa detention facility aron ipakita sa Kanhe Pangulo nga wala sila mibiya kaniya ning panahon sa iyang kalisud.
Pa-ambit pa ni Sarsate, tungod kay bawal silang makabisita sa sulod sa prisuhan, didto sila magtapok sa likod sa maong pasilidad diin nahimutang si Duterte.
Mosinggit matud pa sila og madunggan usab sila sa Kanhe Pangulo. Sa maong pamaagi matud pa, direkta silang maka-estorya ni Duterte.
Gibutyag usab ni Sarsate nga base sa nahimong pamahayag ni Atty. Nicholas Kaufman, posibleng sunod tuig pa ang mahitabong full blown trial sa kanhe pangulo sa giatubang niining kaso.
Sumala pa niini nga nasubo sila sa nahimong disesyon sa ICC nga pagkumpirma sa mga kaso apan ang mahitabong pagtaral, higayon matud pa nga ma-cross-examine sa depensa ang mga ebidensiya og witnesses.
Ang nakapasubo lang matud pa kay sa mga panahong himoon ang pagtaral, si Kanhe Pangulong Rodrigo Duterte nagpabilin sa prisuhan nga nag-inusara.
