BUTUAN CITY – Gi-andam na ang mga kasong ipasaka batuk sa duha ka suspetsado nga naaresto human nakuhaan og ilegal nga drogas og armas sa gikasang buy-bust operation kaganinang alas 12:20 sa kaadlawon sa may Purok 1, Barangay Los Angeles, Butuan City.
Sa impormasyon gikan sa Butuan City Police Station-6, naila ang mga nadakpan nga sila alyas “Jhon²”, 20 anyos, usa ka Street-Level Individual (SLI), ug residente sa Barangay Antongalon, Butuan City; ug alyas “Jerry”, 39 anyos, ug residente sa Barangay Holy Redeemer, Butuan City.
Base sa imbestigasyon, nadakpan ang mga suspetsado human malampusong nakapalit ang poseur-buyer og gidudahang ilegal nga droga gikan sa usa sa mga suspetsado diin narekober sa mga operatiba ang gibana-banang 6 gramos nga gidudahang shabu nga adunay Standard Drug Price (SDP) nga nagkantidad og Php 40,800.00.
Lakip sa nakuha ang usa (1) ka .38 kalibre nga pusil nga adunay tulo (3) ka buhing bala, personal nga mga gamit, ug ang marked money nga gigamit sa operasyon.
Ang mga nadakpan anaa na sa kustodiya sa Police Station 6 alang sa hustong disposisyon ug pagpasaka sa angay nga kaso tungod sa paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.
Sa nahimong pamahayag ni PCPT Darlin C. Migullas, Acting Station Commander sa Butuan City Police Station 6, gipasidunggan niya ang mga operatiba alang sa malampusong pagpahigayon sa operasyon ug mipadayag sa padayon nga lig-on nga kampanya sa estasyon batok sa ilegal nga droga.
