BUTUAN CITY – Mi-abot sa 27 ka mga bag-ong kaso sa COVID-19 ang natala karong adlawa sa tibuok Caraga Region nga gilangkuban sa 15 ka mga babaye ug 12 ka mga lalaki kondiin 56-porsiento niini, anaa sa mga edad nga 21 hangtud sa 50-anyos.
Sa maong ihap, unom ang natala sa Agusan del Norte nga gilangkuban sa 3 sa lungsod sa Nasipit; duha sa Kitcharao ug usa sa Nasipit samtang 5 sa Cabadbran City nga nabahin og tag-usa sa Brgy. Brgy. 12; 9; Bay-ang, Caasinan ug Pirada samtang nakatala usab og tulo ka mga bag-ong kaso ang lalawigan sa Agusan del Sur nga natala sa mga lungsod sa Santa Josefa nga duna’y duha ug usa sa Bunawan.
Duha ka mga kaso usab ang natala sa Surigao del Norte nga natala sa mga lungsod sa Bacuag ug Placer samtang 6 ka kaso sa Surigao City nga nabahin sa Brgy. Washington -3 ug tag-usa sa Brgy. Mabua, Rizal ug Taft; duha ka mga kaso na usab ang natala sa Lingig, Surigao del Sur; usa ka Brgy. Telaje sa Tandag City ug usa dinhi sa Butuan City nga natala sa Brgy. Lumbocan ning siyudad.
Sa bag-ong mga kaso, 15 ang mga local transmission cases, usa ang frontliner, lima ng health care workers samtang siyam ang lain pang uban kondiin ang ilang status, 13 ang wala’y mga simtomas; siyam ang mild, upat ang kritikal.
Sa 27 ka mga bag-ong kaso, 25 ang naka-quarantine, gi-monitor ug padayong gi-atiman samtang duha ang bag-ong patay nga gilangkuban sa usa ka 49-anyos nga lalaking taga-Magallanes, Agusan del Norte kinsa usa ka diabetic, nakasinati og balik-balik nga ubo, harat nga tutunlan, lapoy ang lawas ug naglisod pagginhawa niadtong Oktubre 10 rason nga gi-admit sa Oktubre 24 apan namatay pagkasunod adlaw.
Ang ikaduhang namatay mao ang usa ka 65-anyos nga lolang taga-Placer, Surigao del Norte nga diabetic, gihilantan og naglisod og ginhawa niadtong Oktubre 13 rason nga gi-admit pagka-Oktubre 16 apan tungod sa komplikasyon, namatay ra usab paglabay sa tulo ka mga adlaw.
