BUTUAN CITY – Misangpot sa masusubong panghitabo ang unta malinawon nga pagpangaligo og dagat sa pamilyang Doyugan human nga nalumos ang 14-anyos nilang kabanay kaganinang hapon sa usa ka beach resort sa District 3, Barangay Sacol, Buenavista Agusan del Norte.
Nasayrang nabulabog ang mga naligo sa maong beach resort mga bandang ala 1:45 sa hapon human ang gikataho nga adunay bata nga nalumos. Usa ka 14-anyos ang biktima nga residente sa Purok 7, Barangay Bitan-agan, Butuan City.
Sumala sa pagsaysay sa inahan nga si Ludivina O. Doyugan, 41-anyos, samtang nangaligo ang ilang pamilya sa maong lugar nananghid ang iyang anak nga maligo sa dagat, apan kalit lang nila nga namatikdan nga nag wara-wara na sa iyang kamot ang biktima nga daw nangayo ug tabang, hinungdan nga dali usab kini nga girespondehan sa mga nakakita.
Apan tungod sa kakusog sa current sa tubig dagat hinungdan nga nadala kini sa balud ug wala na makita. Daling nangayo ug tabang ang pamilya sa mga rescuers pinaagi sa Municipal Disaster Risk Reduction and Management Office (MDRRMO) sa Buenavista, ug gisuhid ang kadagatan sa maong lugar.
Paglabay sa 20 minutos nakit-an ang biktima nga nag lutaw-lutaw sa tubig ug dali nila kini nga gitabang. Gidala usab kini sa Nasipit District Hospital apan gideklarang Dead On Arrival attending physician.
