BUTUAN CITY – Wala na’y plano ang pamilya sa usa ka 13-anyos nga batang lalaki nga ipa-otopsiya pa ang iyang patay’ng lawas human kini nakit-ang wala na’y kinabuhi human naghikog luyo sa balay sa ilang silingan sa Purok 7 gamit ang bakus sa belt bag.
Una nang gibutyag ni Kapitan John Benjamin Rosales sa Brgy. Limaha ning siyudad nga base sa iyang pakisusi posibleng gikaguol sa bata ang wala pagtugot sa iyang inahan nga muduaw siya sa iyang amahang nakabuwag sa iyang inahan ug bag-o lang nakagawas gikan sa prisuhan isip pagsunod sa health protocols.
Sa eksklusibong pakighinabi sa Bombo Radyo Butuan, gidugang ni Kapitan Rosales nga kagahapon pa nila gipangita ang biktima apan kaganinang kaadlawon na kini napalgan sa ilang silingan nga walay nay kinabuhi.
Sigon pa ni Kapitan Rosales, gusto unta niyang ipa-otopsiya ang biktima tungod kay duna kini mga samad ug nagbuwa-buwa pa ang baba dihang kini napalgan apan nagdumili na ang inahan ug ang ama-ama niini tungod sa kagustuhang malubong gilayon kini.
Tungod niini, ipasubay na lang sa kapitan ang CCTV duol sa panghitaboan aron masuta kung kinsa ang katapusang naka-uban sa biktima adiser kini namatay.
