BUTUAN CITY – Gipangita karon sa kapulisan ang mga suspek human sa dili momenos sa 12 ka tawo nga gipamusil duol sa usa ka festival sa Toledo, sa midwestern nga estado sa Ohio sa US.
Sigon sa Toledo Police Department, 10 ka tawo ang “gikatahong anaa sa stable nga kondisyon, samtang duha ang nagpabilin nga kritikal.”
Miresponde sila sa taho nga pagpamusil duol sa Old West End Festival sa may alas 5:37 sa kagahapon sa hapon.
Sumala ni Toledo Deputy Police Chief Joe Heffernan, sa ilang lantaw dunay duha ka tawo nga nagpabuto og armas ug daw nag-pinusilay ang duruha.
Sa mga video nga mikaylap, makita ang mga tawo nga nangatarantar, nanagan, ug naninggit samtang madungog ang sunod-sunod nga buto sa armas.
Sa uban pang mga video, makita ang duha ka tawo nga gisakay sa stretcher, ug pipila ka samaran nga naghigda sa sagbot duol sa usa ka dako nga tolda
Ang mga biktima anaa sa pangedarong 16 hangtod 61 anyos.
Unang gipahayag ni Toledo Mayor Wade Kapszukiewicz sa lokal nga balita nga WTOL 11 nga gilauman rang mabuhi ang tanang biktima.
Nagpadayag sa iyang kakurat si Police Lt. Dan Gerken sa grabe nga ka-biyolente sa insidente diin kini ang pianakadaghang tawo nga napusilan nga iyang narespondihan.
Sumala ni Gerken nga nakig-estorya na ang kapulisan sa mga biktima ug mga saksi, ug ilaha na usab nga ginasusi ang mga footage sa camera. Nanawagan usab siya og tabang gikan sa lokal nga komunidad.
Ang Old West End Festival mao ang “duha ka adlaw nga kalihokan nga nagsaulog sa usa sa pinakadako nga makasaysayanong distrito sa nasod, nga dunay live music, mga tindahan sa pagkaon, beer garden, house tours, shopping, ug uban pa.”
Sumala sa kapulisan, ang imbestigasyon naglangkob karon sa dapit sa Delaware Avenue ug Robinwood Avenue. Sa mapa nga anaa sa website sa festival, makita nga dunay dapit alang sa musika ug pagkaon sa maong eskina.
