BUTUAN CITY – Napulo ka mga piniling sakop sa priority A4 ang malampusong nabakunahan kaganina sa mga personahe sa Department of Health kon DOH-Caraga, subay sa ilang gilusad nga symbolic COVID-19 vaccination roll out sa may Robinson’s Place ning siyudad sa Butuan.
Sa eksklusibong pakighinabi sa Bombo Radyo Butuan, gipadayag ni DOH-Caraga regional director Dr. Cesar Cassion nga napulo ang ilang gipili sa entiro rehiyon tungod kay simboliko man lang ang maong pagpamakuna apan mu-abot sa 5-mil kung sumadahon ang sa tibuok nasud.
Gituyo matud pa kini isip pagsaludo usab sa mga essential workers nga maoy apil sa priority A4 list subay na sa pagsa-ulog karong adlawa sa Labor Day ug paghatag og importansya sa maong sektor.
Gidugang sa opisyal nga ang A4, gi-identify mismo sa National Economic and Development Authority kon NEDA kansa dakong tabang sa kagamhanan aron mapadayon ang mga ekonomikanhong kalihukan.
Kabahin matud pa sila sa recovery sector sa nasud rason nga angayan silang unahon usab sa pagbakuna higayong duna na’y available nga COVID-19 vaccines.
