BUTUAN CITY – Padayon pa ang pagsuta sa Bureau of Fire Station kon BFP-Butuan sa kinatibuk-ang damyos human gilamoy sa kalayo ang gibana-banang napulo ka mga balay sa may Brgy. San Ignacio ning siyudad sa Butuan.
Sigon ni Butuan City Fire Marshal Fire Supt Rex Arvin Apalla sa eksklusibong pakighinabi sa Bombo Radyo Butuan, nagsugod pag-ulbo ang kalayo pasado ala-1:10 sa hapon nga nagrespondihan gilayon nila paglabay sa 15-minutos.
Base sa ilang inisyal nga pakisusi, nagsugod pag-ulbo ang kalayo sa pinuy-anan ni Christopher Ian Satago og paspas nga mikaylap sa uban pa tungod sa kusog nga hangin ug gama pa sa light materials ang mga nasunog nga pinuy-anan.
Apil sa nasunog ang boarding house ng gipang-iyahan sa usa ka pulis ug gi-ukupahan ni Gilbert Gargar kinsang asawa wala gyoy nakuhang mga butang gawas sa kwarta ug alahas tungod sa kapaspas sa pag-ulbo sa kalayo.
Gibutyag niining duty siya sa usa ka optical clinic sa Gaisano Mall dihang gitawagan siya ug gipahibalong nasunog na ang ilang gipuy-an rason nga wala na siya’y na-abtan pa pag-abot sa gipuy-an nilang boarding house.
Apan mas sakit ang nahitabo sa laing boarder nga si Rizabelle Mercado nga taga-Magallanes, Agusan del Norte kinsa usa ka buwan pa lang nga na-board.
Iyang gibutyag nga nag-duty usab siya sa mall ug gitawagan na lang nga nasunog na ang ilang gipuy-an rason nga apil sa na-abo sa kalayo ang iyang gibilin nga 3-mil pesos nga sweldo.
Tungod kay wala siya’y nasalbar nga gamit, tapot lawas lang ang iya karong gikuptan.
