BUTUAN CITY – Subling gi-demand karon sa mga public utility jeepney kon PUJ drivers ug operators ang laing usa ka tuig nga extension sa franchise consolidation alang sa gihingusgang Public Utility Vehicle kon PUV Modernization Program sa kagamhanan human nag-expire ang deadline niini niadtong Disyembre 31, tuig 2023.
Sa eksklusibong pakighinabi sa Bombo Radyo Butuan, gipasabot ni Wilson Fortaleza, tigpamaba sa Partido Manggagawa nga kinahanglan nila ang usa ka tuig nga extension aron wala’y mabilin ilabina sa mga drivers higayong hingpit nang gamiton ang mga modern units sa dyip.
Ang usa ka tuig nga extension, dakong gamit kung duna pay mutumaw nga mga problema sa consolidation ilabina nga i-organisa na ngadto sa asosasyon o kaha kooperatiba ang mga jeepney units kansa duna na unya’y kaugalingong mga ruta.
Gipasabot pa ni Fortaleza nga ang nasangpit nga programa wala lang nagtumong sa mga modernong yunit sa dyip kondili apil na sa rationalization sa mga ruta nga mao matud pa’y pinakagubot ug maoy angayang resolbahon.
