BUTUAN CITY – Gihaya na sa usa ka puneraryo ang patay’ng lawas sa usa ka 43-anyos nga mag-uuma human kini napusilan sa usa ka 67-anyos nga lalaki atol sa komprontasyon sa Barangay Ima, Sison, Surigao del Norte, miadtong alas 3:25 sa nakalabay nga hapon.
Sa impormasyong nakuha gikan sa Sison Municipal Police Station, naila ang biktima nga si Leo Deloy Becina, minyo ug residente sa Barangay Ima, samtang ang suspek giila nga si Freddie Gardo Calang Abian, biyudo ug residente sa Purok 1, Barangay Anomar, Surigao City.
Ang duruha gituohang ilalom sa impluwensya sa ilimnong makahubog ug naglalis. Dinhe na mipauli ang biktima aron mokuha og kutsilyo, samtang ang suspek mikuha sa iyang kalibre .45 nga pistola.
Sa ilang subling pag-agbat sa gymnasium sa barangay, giingong giluba sa biktima ang suspek, hinungdan nga gipusil kini sa suspek sa makadaghang higayon.
Apan, sumala sa pipila ka mga saksi ang suspek maoy unang mipabuto sa iyang armas, ug human niini pa lamang nakaluba ang biktima sa suspek. Human sa insidente, nadakpan sa mga mirespondeng pulis ang suspek sa iyang panimalay.
Narekober usab ang usa ka caliber .45 pistol, pito ka basiyo sa bala sa kalibre .45, ug usa ka kutsilyo nga nakuha sa crime scene.
Anaa na sa kustodiya sa Sison Municipal Police Station ang suspek ug giandaman ang tukmang mga kaso.
