BUTUAN CITY – Mi-abot na karon sa 184 ka mga tawo ang kumpirmadong patay sa tibuok Caraga Region tungod sa COVID-19 pandemic human nadugangan og usa ang listahan sa Department of Health-Center for Health and Development kon DOH-CHD-Caraga sa resulta kagahapong adlawa.
Kini pinaagi sa usa ka 80-anyos nga lolo nga taga-Madrid, Surigao del Sur kinsa duna’y lung infection ug naglisod pagginhawa niadtong Nobyembre 13 rason nga gi-admit sa ospital paglabay sa duha ka mga adlaw apan tungod sa mga komplikasyon, namatay niadtong Disyembre 4.
Sa 11 ka mga bag-ong kaso, 9 niini ang mga lalaki ug 2 ang mga babaye kondiin 82-porsiento ang anaa sa edad nga 21 hangtud 50-anyos ug kining tanan, gi-quarantine na, gi-monitor ug gi-atiman sa nagkada-iyang quarantine facilities ning rehiyon.
Sa maong ihap, 4 ang natala sa Agusan del Sur nga nabahin sa mga lungsod sa Bunawan -2 ug tag-usa sa mga lungsod sa Rosario ug San Francisco ug 4 usab sa Surigao City nga nabahin sa Brgy. Taft ug Washington nga parehong mitala og tag-duha ka mga kaso.
Duha ka mga kaso usab ang natala sa Surigao del Sur nga na-apod sa tag-usa ka kaso sa Carrascal ug Marihatag ug usa ka kaso sa Cagdianao, Dinagat Islands province samtang wala’y natalang kaso sa dakbayan sa Butuan.
Sa kinatibuk-an, ang Caraga Region mitala na og 3,909 ka cumulative COVID-19 cases kondiin 400 niini ang mga aktibong kaso ug 3,325 ang nakarekober.
