BUTUAN CITY – Bisan og dili kaayo grabe ang winter storm nga mi-igo sa east coast sa Estados Unidos, apan mas mingaw kini karon kumpara sa mas grabe pa nga mi-igo sa maong nasud ning mi-aging katu-igan.
Kini ang obserbasyon ni Bombo international correspondent Lain Dave direkta gikan sa New York ug kini tungod na usab sa nagtunhay pang COVID-19 pandemic.
Sa eksklusibong pakighinabi sa Bombo Radyo Butuan, gibutyag ni Lain Dave nga sa nangaging mga winter storm, duna’y nasinatiang huot nga dagan sa trapiko tungod sa kadaghan pa sa mga manulod sa ilang trabaho sukwahi karon nga pipila lang ang nagtrabaho tungod kay mas daghan ang nag-work from home.
Mas gipili matud pa sa katawhan sa Amerika nga magpuyo na lang sa balay aron dili masakit ilabina nga susama ra ang mga simtomas sa flu ug sa COVID-19.
Wala usab matud pa’y angayang kabalak-an tungod kay sa ingon niini nga panahon, duna na’y gi-andam nga mga trak ang kagamhanan aron maoy mudaro sa mga snow diha sa kadalanan.
