BUTUAN CITY – Positibo sa E. coli ug Coliform bacteria ang tanang water refilling stations sa mga lungsod sa Dapa ug General Luna sa Siargao Island lalawigan sa Surigao del Norte.
Sa eksklusibong pakighinabi sa Bombo Radyo Butuan direkta gikan sa maong isla, gikumpirma ni Bombo Siargao correspondent Roel Catoto nga base kini sa findings sa Department of Health kon DOH-Caraga human natala ang sunod-sunod nga mga kaso sa diarrhea, acute gastroenteritis ug dehydration sa nasangpit nga isla.
Bisan matud pa og giproseso na ang nasangpit nga mga tubig kansa gibutang na sa mga sudlanan ug maoy gikunsumo sa mga tawo, wala kini pasaylua sa maong mga bacteria rason nga padayong misaka ang ihap sa mga tawong nakabaton og water-borne diseases.
Gawas sa ayudang tubig ma-inom gikan sa nagkalain-laing mga donors, temporaryo usab nga nagkuha og tubig ang mga refilling stations ngadto sa lungsod sa Del Carmen kansa pasado sa gihimong test sa DOH.
Gidugang pa ni Catoto, sa kasamtangan, ang mga refilling stations sa Siargao Islands kansa dili na operational tungod sa mga damyos o kaha kawala’y linya sa kuryente human ang paghapak sa bagyong Odette, karon gipa-andar na kondiin pulos na kini subsidized sa mga pribadong organisasyon.
Gihatagan usab ang uban og generator set ug gasolina apil na sa gobyerno apan dakong problema gihapon hangtud karon ang kawala nila’y supply sa hinlong tubig ma-inom.
