Wala na paggamit og metrohan sa mga taxi drivers sa Caraga Region, gisusi na sa LTFRB

BUTUAN CITY – Gipatawag na ni Jun Darapa, Regional Director sa Land Transportation Franchising and Regulatory Board kon LTFRB-Caraga ang mga taxi drivers ning rehiyon human nadungog nga wala na kini migamit og metro sa pagpamasada.

Sigon sa opisyal, nagsabot na sila nga dili na nila kini buhaton tungod kay dili usab siya magduha-duha sa pagpahamtang sa penalidad.

Ugaling mapamatud-ang nagbuhat niini ang drayber, duna kini penalty nga 5-mil pesos sa unang  kalapasan, 10-mil pesos sa ikaduhang paglapas og 15-mil pesos sa ikatulong kalapasan dayung kansela sa prangkisa.

Pagklaro sa opisyal nga walay balidong rason sa dili paggamit sa metrohan sa taxi tungod kay kini ang hinungdan nga gihatagan sila og prangkisa.