BUTUAN CITY – Gipakomento karon sa Korte Suprema ang mga respondents sa giduso ni Senador Ronald ‘Bato’ de la Rosa nga urgent manifestation with omnibus motion ug extremely urgent supplemental manifestation with motion.
Kini aron makahatag sila sa ilang tubag sulod sa 72-oras kon tulo ka adlaw kalabot sa tinguha sa senador nga pugngan ang impelementasyon sa warrant of arrest nga gi-isyu sa International Criminal Court kon ICC pinaagi sa Temporary Restraining Order kon TRO.
Ang mga respondents sa petisyon ni Senador Ronald “Bato” dela Rosa mao ang mga ahensya ug opisyal sa ehekutibo nga responsable sa pagpatuman sa ICC arrest warrant sama sa Office of the Executive Secretary (OES) nga maoy nagrepresentar sa Malacañang ug sa Presidente sa Pilipinas.
Anaa usab ang Department of Justice (DOJ) nga responsable sa legal nga proseso ug extradition matters, ang Department of the Interior and Local Government (DILG) nga adunay oversight sa Philippine National Police kon PNP ug uban pang law enforcement agencies, ang Philippine National Police nga maoy direktang magpatuman sa mga arrest warrants, Bureau of Immigration (BI) nga maoy magdumala sa pagbiyahe ug pag-exit/entry sa mga indibidwal nga posibleng subject sa ICC warrant ug ang National Bureau of Investigation (NBI) – usa sa mga ahensya nga mupatuman sa ICC arrest warrant batok kang dela Rosa.
Kung dili makahatag og lig-on nga rason ang kampo ni dela Rosa, posible nga dili ihatag sa Korte Suprema ang TRO.
Ang mahimong desisyon unya sa Korte Suprema, mahimong maka-apekto sa reputasyon ug posisyon sa senador ug sa kanhi administrasyon.
Nasayrang nagpadayon karon ang ICC sa ilang proseso, ug ang Pilipinas mahimong masulod sa mas lawom nga diskusyon bahin sa hurisdiksyon ug kooperasyon sa international tribunal.
