BUTUAN CITY – Naplastar na sa barko sa may Port of Masao sa Brgy. Lumbocan ning siyudad sa Butuan ang mag-live in partner nga sila Gary de la Cruz ug Lourdes Chuneri alang sa ilang pagpa-uli na sa Guimaras via Iloilo City.
Gi-facilitate ang ilang pagsakay sa barko sa Butuan City Police Office kon BCPO pagpanguna ni City Police Director Col. Marco Archinue kinsa unang miduaw kanila dinhi sa compound sa Bombo Broadcast Center kagahapon aron pag-assess sa ilang kahimtang.
Makatindog-balahibo ang nadawat nga espesyal nga pagtagad sa magti-ayon human sa ilang pagdangop sa Bombo Radyo tungod kay dihang nasuta ni Col Archinue ang ilang sitwasyon, gihatud pa sila og convoy padulong sa Port of Masao pinaagi sa ilang patrol vehicle uban sa ilang mga police bikers nga apil sa nag-escort kanila.
Una nang gibutyag ni PLCol. Sandy Dacera, hepe sa Community Affairs Division sa BCPO, nga gipasiguro gayod sa city police director nga luwas nga mahatud ang magti-ayon ngadto sa Port of Masao hangtud na sa barko.
Nanghinaut kini nga maka-uban na sa hingpit ilabina ni Nanay Lourdes ang iyang mga anak nga atua sa Guimaras ilabina ang iyang kinamanghurang anak nga maoy ilang gi-apas sa Tagum City gikan sa ilang gipuy-an sa Sta. Rosa. Laguna.
Nagpasalamat usab siya sa Bombo Radyo ug sa mga tawong mitunol og tabang ngadto kanila.
Samtang dako usab ang pagpasalamat nila Nanay Lourdes Chuneri ug Tatay Gary de la Cruz ngadto sa Bombo Radyo tungod kay wala sila napakyas sa ilang pagduol sa pangindahay nga matabangan silang maka-uli sa Guimaras human ang kapin tulo ka buwang pagsikad, makita lang ang kamanghurang anak ni Nanay Lourdes nga halos duha ka dekada na niyang wala makita human gitaban.
Sigon sa sulundong inahan, magsikad pa unta sila padulong sa Cagayan de Oro City kung wala sila miduol sa Bombo Radyo nga maoy nahimong yawe aron mas mapagaan ang ilang pagbiyahe.
Kini ilabina nga gi-abaga sa Butuan City Police Office ang ilang pamasahe sa barko padulong sa Cebu City kondiin sila manukad na usab pasakay og laing barko padulong sa Iloilo City.
Sigon ni Nanay Lourdes, dili na niya tugutang malayo pa sa iyang mga anak ilabina nga edaran na siya ug kinahanglan na niya ang pag-atiman sa iyang mga anak.
