BUTUAN CITY – Gipahayag sa militar sa US nga ilang napabuto ang upat ka Iranian one-way attack drones nga gilusad paingon sa Strait of Hormuz dayung butyag nga ang mga drone naghatag og direkta nga hulga sa maritime traffic sa rehiyon.
Sumala sa United States Central Command, ang mga pwersa sa US misunod pinaagi sa pag-atake sa mga Iranian coastal surveillance radar sites sa Goruk ug sa Qeshm Island aron mapugngan ang dugang pang mga pag-atake.
Mitubag ang Iran pinaagi sa pagpabuto og mga ballistic missile ngadto sa duha ka base militar sa US sa Kuwait ug sa mga pasilidad sa US Navy sa Bahrain, sumala sa state-run nga Islamic Republic of Iran Broadcasting.
Sumala sa Centcom, ang unang pagtimbang-timbang nagpakita nga sa pito ka Iranian missiles nga gipabuto ngadto sa duha ka nasod sa Gulf, unom ang nasagang ug usa wala makaabot sa target niini.
Nahitabo kini pipila ka adlaw human magbayloay og mga pag-atake ang US ug Iran, nga maoy hinungdan sa pagsaka sa tensyon ug naghulga sa huyang nga kasabutan sa tigpahunong sa panagbangi tali sa duha ka nasod.
Usa ka tawo ang namatay ug kapin sa 60 ang nasamdan sa pag-atake sa drone sa internasyonal nga tugpahanan sa Kuwait niadtong Miyerkules, sumala sa lokal nga mga opisyal.
Apan ang Islamic Revolutionary Guard Corps mipasabot nga wala sila’y kalabotan sa pag-atake sa tugpahanan ug gibutyag nga ang kadaot resulta sa sayop nga pagpabuto sa usa ka US missile interceptor.
