BUTUAN CITY – Gikataho sa Department of Health kon DOH CHD Caraga ang unang kumpirmadong napatay tungod sa COVID-19 sa rehiyon. Kini mao ang kaso sa 55-anyos nga lalaki gikan sa Butuan City kansa nakasinati og simtomas niadto pang Hulyo 3, 2020 sama sa ubo, sip-on, pagpanakit sa tutunlan, hilanat og pagpanugnaw.
Tungod kay walay timaan sa pagka-ayo, gi-admit ang pasyente sa health facility niadtong Hulyo 14, 2020.
Sa ikaduhang adlaw sa pagka-hospital, ang pasyente naglisud na kini og ginhawa rasong gikuhaan og Specimen ug nakumpirma nga kini positibo sa COVID-19 base sa RT-PCR laboratory result.
Sa paglantaw sa history, ang pasyente wala makabiyahe sa gawas sa siyudad o ba kaha na-exposed sa confirmed, probable o suspect COVID-19 case. Rasong kini nga kaso sa local transmission.
Ang final diagnosis sa kaso mao ang Acute Respiratory Syndrome, Community Acquired Pneumonia High Risk, COVID-19 positive confirmed, Septic Shock. Ang patay’ng lawas niini, ilubong sulod sa 12 ka oras. Nagpaabot usab og pahisubo ngadto sa nahabiling pamilya si Regional Director Jose R. Llacuna, Jr.
Sa karun ang DOH Caraga hugot nga nakig-koordina sa Local Contact Tracing Team og hingtungdang health facility aron kompletong matumbokto ang close contacts sa kaso, mamonitor ang ilang panglawas ug ipailalom sa quarantine procedures.
Dugang pa sa opisyal nga gihimo na ang swabbing sa close contacts niini. Tungod niini, hugot nga miapela si LLacuna sa tanang mga Butuanons og Caraganons nga mutuman sa minimum health standards.
Magpuyo sa balay ug mogawas lang kung gikinahanglan. Ugaling mogawas o motrabaho magsoot sa face masks.
Kanunayon ang paghugas sa kamot o mogamit sa hand sanitizers. Kanunay nga e-mintina ang distansiya nga usa ka metros gikan sa ubang tawo.
