BUTUAN CITY – Duna na’y contingency plan ang lokal nga kagamhanan ning siyudad sa Butuan uban sa Department of Agriculture ug National Irrigation Administration kon NIA alang sa gikatakdang paghapak sa super El Niño sa entiro nasud sa katapusang kwarter ning tuiga.
Sa eksklusibong pakighinabi sa Bombo Radyo Butuan, gipadayag ni Engr Pierre Anthony Joven, hepe sa Butuan City Agriculture and Veterinary Department, nga duha ka buwan na nilang gipangandaman ang umalabot nga phenomenon pinaagi sa ilang pakig-alayon sa mga hingtungdang national government agencies.
Gipadayag sa opisyal nga ang dakbayan sa Butuan duna’y kinatibuk-ang 8-ektaryang rice area as of ning tuiga kondiin 80-porsiento niini kon bugti sa 6,400-ektarya ang duna’y irigasyon samtang ang nahabiling 20-porsiento kon bugti sa 600-ektarya, nagsalig lang sa ulan.
Base sa ilang na-obserbahan ning mi-aging tuig 2025 gamit ang rice area sa siyudad, duna’y 96-porsiento nga rice sufficiency level kansa nagpasabot nga ang gikunsumong bugas sa mga Butuanons, naggikan sa mga local farmers.
Kini base na sa duha ka cropping seasons ning siyudad gikan sa Disyembre ngadto na sa Abril kon sa pagtapos sa unang kwarter kada-tuig kondiin abunda ang ulan ug ang ikaduhang cropping season nga magsugod sa Hunyo hangtud na sa Oktubre kondiin nihit ang ulan.
Giklaro ni Joven nga bisan pa man sa hulgang dala sa maong phenomenon, dili kini angayang kabalak-an tungod kay duna usab matud pa kini dala nga kaayuhan.
Dugang pa ni Joven, duna na’y giplastar nga mga lakang ang lokal nga kagamhanan ka-uban ang nagkada-iyang local offices higayong muhapak na ang El Niño phenomenon aron dili kini maka-apekto og dako sa agricultural sector gamit ang tulo ka mga pillars.
