BUTUAN CITY – Mipahayag si U.S. President Donald Trump nga magpatuman ang Estados Unidos og naval blockade sa Strait of Hormuz human mapakyas ang peace talks tali sa Iran ug ubang mga nasud nga gihimo sa Islamabad, Pakistan.
Sa usa ka post sa Truth Social, gibutyag ni Trump nga gelayong sugdan sa U.S. Navy ang pagbabag sa tanang barko nga mosulod ug mogawas sa maong agianan sa lana. Tumong niini nga pugngan ang Iran sa giingong pagpangolekta og “illegal toll” gikan sa mga barko.
Dugang pa niini nga moapil usab matud pa ang ubang mga nasud sa maong blockade, ug dili tugotan ang Iran nga mokita samtang naapektuhan ang global nga ekonomiya.
Nagpasidaan usab si Trump nga dakpon o babagan sa U.S. Navy ang tanang barko sa international waters nga giingong nagbayad og “toll” sa Iran bugti sa pag-agi sa Strait of Hormuz.
Ang Strait of Hormuz usa sa labing importante nga agianan sa suplay sa lana sa kalibutan, diin moagi ang dakong bahin sa global nga suplay sa petrolyo.
Tungod niini, ang bisan unsang pagbaba niini mahimong makahatag og dako nga epekto sa global nga ekonomiya.
Sa pagkakaron, wala pa’y opisyal nga kumpirmasyon gikan sa National Defense sa Estados Unidos.
