BUTUAN CITY – Misalmot ang Trade Union Congress of the Philippines kon TUCP sa National Wage Coalition rally karung adlawa, Labor Day kauban ang nagkada-iyang grupo sa mamumu-o sama sa Kilusang Mayo Uno ug Federation of Free Workers diin gipanawagan ang dugang 150 pesos nga suhulan.
Sigon ni Carlos Oñate, Advocacy Officer sa maong grupo, ang ilang hangyo, nakalatid sa TUCP House bill number 7871 alang sa 150 pesos across the board nga dugang suhulan sa mga trabahante.
Sunod semana la-umang ma-aprubahan na kini sa komitiba sa House of Representatives. Gikadismaya usab ni Oñate ang kawala’y plano sa Department of Labor and Employment ug sa Malacanang nga makigdayalogo kanila.
Gitumbok pa ni Oñate ang dakong papel sa mga trabahante diha sa negosyo nga kung walay mamumu-o, wala usay negosyo rasong angayan lang nga pasidunggan og hatagan sa angayan nga suhulan.
Pagbutyag pa niini nga walay laing pamaagi aron pasalamatan ang mga trabahante kundi ang pag-usbaw sa ilang suhulan.
