BUTUAN CITY– Mingsulod na sa Philippine Area of Responsibility (PAR) ang Tropical Storm “Jangmi” kaganiha sa may alas-12:30 sa kadlwon, Mayo 29, ug tawagon kinig “Domeng,” sumala sa Philippine Atmospheric, Geophysical and Astronomical Services Administration kon PAGASA.
Base sa pinaka-ulahing bulletin sa PAGASA, kataposang nakit-an ang bagyo sa gilay-on nga 1,200 kilometros sa sidlakan sa Southern Luzon.
Aduna kini gikusgon sa hangin nga mo-abot sa 75 kilometros matag oras ug paghuros nga mo-abot og 90 kilometros matag oras. Naglihok kini paamihanan sa gikusgon nga 20 kilometros matag oras.
Laumang mokusog pa kini ug posibleng mahimong typhoon category pag-abot sa Sabado, Mayo 30.
Base sa forecast, posibleng mo-gawas sa PAR ang bagyo sa Lunes, Hunyo 1.
Sa kasamtangan padayong gi-monitor sa PAGASA ang lihok sa bagyo samtang gi-awhag ang publiko nga magpabiling alerto sa mga sunod ngaa abiso.
