BUTUAN CITY – Nagpagawas na og warning ang kagamhanan sa Texas sa Estados Unidos nga ibutang sa luwas nga lugar sa balay ang mga bata tungod sa lima ka adlaw nang snow storm.
Sigon sa Butuanong si Joeville Breeding direkta gikan sa Texas, lima ka adlaw na silang na-stock sa ilang balay tungod sa grabeng snow kansa negative 21 ang temperatura.
Sa eksklusibong pakighinabi sa Bombo Radyo Butuan, gipadayag ni Breeding nga sukad sa 12 ka tuig niyang pagpuyo sa maong estado, karon lang nahitabo nga nga milapas sa duha o kaha tulo ka adlaw ang snow storm rason nga grabe katugnaw karon sa ilang lugar nga halos wala na’y epekto ang ilang heater tungod sa snow nga mi-abot na sa 5-pulgadas ang gibag-on.
Dugang pa ni Breeding, nag-anunsyo ang ilang kagamhanan nga i-safety ang mga bata tungod kay sila ang prone sa mga snow bites nga mahimong mupatay tungod kay manuot-suot man sa ka-unuran ang kabugnaw sa panahon.
Sa pagkakaron, duha ka adlaw nang sirado ang mga tughaan ug wala na usa’y abli nga mga grocery ug convenient stores gawas lang sa mga ospital.
Niadto pa lang matud pang Biernes, gitambagan na sila sa ilang lokal nga kagamhanan nga mag-grocery na balor usa ka semana apan daghan ang wala mutuman niini tungod sa pagtuong duha ngadto sa tulo ka adlaw lang mulungtad ang snow storm.
Sa pakakaron, wala na matud pa’y natalang aksidente sa kadalanan tungod kay wala na’y nanggawas human nga nakatala og dagkong vehicular accident niadtong Biernes tungod sa grabeng kadanlog sa dalan.
Apan taliwa pa man sa sobrang natugnaw sa ilang lugar, wala matud pa’y angayang kabalak-an ang ilang mga kabanay dinhi sa Pilipinas tungod kay okey ra ang ilang kahimtang.
