BUTUAN CITY – Baynte-kwatro oras nga nagtrabaho ang Traffic Enforcement Unit sa Butuan City Police Office aron magbantay sa kadalanan ning siyudad sa ingon masiguro ang hapsay nga dagan sa trapiko ug malikayan ang disgrasya sa kadalanan.
Sa eksklusibong pakighinabi sa Bombo Radyo Butuan, gipadayag ni PCorporal Leo Tomoling, seryuso ang ilang paggukod sa mga motoristang mamatikdan nilang nagmaneho og sakyanan nga duna’y kalapasan sa traffic rules nga maoy kasagari matud pang hinungdan sa disgrasya.
Apil na niini ang kawalay saktong suga ug signal lights panahon sa kagabhi-on, kawala’y side mirror, kawala’y suot nga helmet alang sa mga nagmaneho og mga motorsiklo ug uban pa.
Gipadayag niini nga kaniadtong dili pa sila ang nagdumala sa TEU, mayoriya sa nga namatay tungod sa disgrasya mugna sa kawala’y gisuot nga helmet rason nga ilang gihingusgan ug gi-awhag ang katawhan sa pagsuot kanunay og helmet sa ilang matag-biyahe.
Samtang gipadayag usab ni Patrolman Annren Paul Garate nga padayon ang ilang kampanya sa kabaranggayan kalabot sa road safety tips ilabina ngadto sa kabatan-unan aron matudluan sila sa luwas nga pagmaneho sa mga motorsiklo.
Gituyo nila kini tungod kay ang mga batan-on ilabina kadtong mao pa lama’y pagkakat-on pag-drive og motorsiklo ug wala pa’y student permit o kaha lisensya, mao kadto ang kursunda magpadagan og kusog sa motorsiklo ug sila usab ang kasagarang madisgrasya.
Alayon niini, iyang gi-awhag ang mga ginikanan nga dili tugutang magmaneho og sakyanan ang ilang mga anak nga minor-de-edad ug kadtong wala pa’y lisensya aron malikay sa disgrasya ug posibleng pgdakop tungod kay kalapasan man kini sa traffic rules.
