BUTUAN CITY – Mas dakong kabalaka karon ang pagkaylap sa tuberculosis (TB) kumpara sa paglutaw sa bag-ong mga strain sa COVID-19, sumala sa Department of Health (DOH).
Gipasabot ni DOH Spokesperson Undersecretary Albert Domingo nga ang mga sakit sama sa TB kay airborne ug mas paspas mokatag ilabi na sa mga lugar nga daghan og tawo.
Ang maong pamahayag sunod sa pagpirma sa DOH og partnership uban sa U.S. Department of State aron mapalig-on ang pagdiskubre ug pagtambal sa TB sa Pilipinas.
Apil sa maong partnership ang paghatag og igo nga tambal alang sa 230,000 ka pasyente sa TB ug 12 ka ultraportable X-ray machines.
Gibutyag usab ni Domingo nga nakadawat ang Pilipinas og mga 120 milyones dolyares gikan sa Philippine Country Coordinating Mechanism (PCCM) Global Fund alang sa pagtambal sa TB, HIV, ug Malaria.
Sumala sa DOH, labaw sa 100,000 ka kaso sa TB ang natala sa Metro Manila niadtong Pebrero 2026. Padayon nga gipalig-on sa ahensya ang sayo nga screening aron mapugngan ang pagkatap sa active TB.
