BUTUAN CITY – Gihurot og relieve ang tanang sakop sa municipal police station sa lungsod sa Sison, Surigao del Norte gikan sa ilang chief of police ngadto na sa police non-commissioned officers kon PNCOs.
Sa eksklusibong pakighinabi sa Bombo Radyo Butuan, gipadayag ni PCapt. Agustin Navarro – information officer sa Police Regional Office kon PRO-13, nga ang maong lakang base na usab sa kamanduan ni kanhi regional director BGen. Joselito Esquivel Jr. human ng gidagit-patay sa mga rebeldeng New People’s Army kon NPA ang ilang ka-ubanang si PSSgt Restie Dandan.
Sigon ni Captain Navarro, temporaryo lang ang pagka-relieve sa maong mga pulis naka-abot na sa police regional headquarters aron ipa-ilalom sila sa ‘Refresher Course’.
Tungod niini, temporaryo usab nga gidestino sa nasangpit nga municipal police station ang mga sakop sa Regional Mobile Force Battalion ug mga imbestigador sa Surigao del Norte Police Provincial Office.
Hinuon, duna pa’y giproseso alang sa pagpabalik sa mga key personnel aron matibawas ang ilang wala pa matapos nga trabaho.
