BUTUAN CITY – Padayon pang gipangita sa kapulisan ang usa ka sundalo human misibat dihang na-unay niya og pusil-patay ang iyang ig-agaw pasado alas-otso sa gabii.
Naila ang suspek nga si PFC Erick Salahay, 24-anyos, nadestino sa Tagkiling Patrol Base sakop sa 29th Infantry Battalion, Philippine Army nga nakabase sa Sitio Tagkiling, Brgy. Anticala ning siyudad sa Butuan samtang ang biktima nailang si Dominic Salahay, parehong residente sa maong dapit.
Sa eksklusibong pakighinabi sa Bombo Radyo Butuan, gibutyag sa station commander sa Butuan City Police Station 4 nga si PCaptain Rodel Dorado nga nagdula og billiards ang ang suspek ka-uban ang iyang ka-ubanang sundalo dihang gisamuk-samuk siya sa biktima kondiin kuhaon ang kalibre 45 niining armas nga gitak-in sa hawak sa suspek.
Gidala pa sa Butuan Medical Center ang biktima apan gideklara kining dead-on-arrival sa attending physician.
Migawas sa ilang inisyal nga imbestigasyon nga duna’y dili maayong record sa ilang lugar ang biktima tungod sa kabadlungon niini og posibleng ang personal matud pa nilang bikil maoy nakasugnod sa suspek aron pusilon ang iyang ig-agaw.
Duha ka higayon matud pang gisulayan og ilog sa biktima ang armas sa sundalo ug sa ikatulo niining pagsulay, dinhi na siya gipusil diha sa iyang lawas kondiin parehong nanglapos ang mga bala.
Samtang gibutyag usab sa nakasaksi sa maong hitabo nga si Genevieve nga ang biktima maoy nagsamok-samok sa suspek taliwa nga wala kini hilabti.
Posible matud pang na-ulit na ang suspek rason nga dihang sa ikatulong higayon, gisulayan na usab niini og ilog ang armas sa sundalo, dinhi na siya gipusil.
